Sparse Ässe 2023

S draditionelle Sparseässe vom Mittwuche, 10te Mai 2023

Es isch gar no nit lang här dass mer e ganz e scheeni Fasnacht hän derfe gniesse, denn isch dr luschtig, verschiffti Bummel ko und scho isch wieder s Sparseässe im Sängerstübli z Rieche aagseit gsi. Mir hän uns ab de sächsi im Garte under de Sunneschirm droffe. S hett zem Gligg emool nit grägnet. Nodisno sin 24 Agtivi und e paar Passivi ydrudlet. Me hett zerscht emool e Aperitiv gnoo und isch zem Aesse ins Reschtorant ine gange. Me hett enander die neischte Nachrichte verzellt und au iber d Politik und natirlig au iber dr FCB mit ihre dumme rote Karte diskutiert. Leider hett unser langjäärigs, verdients Mitglied dr Rolf sen. nimm kenne bi uns sy är hett uns woorschynlig vom Himmel obenabe zuegluegt-wär weiss!

Scho ischs Sparsesippli ko, wie allewyl isches seer fein gsi. Zue de Sparse hett me denn halt e scheene Wy bstellt. Denn isch serviert worde. Uff jedem Täller hetts feini, frischi Sparse gha und e paar Broothärdepfeli. Uff em Tisch sin Tepfli mit Mayonnaise und Sauce hollandaise gstande. Und denn sin grossi Plate mit Beischungge und Rohschungge ko. Es hett wirglig gluschtig usgsee. Jetz hett me kenne gniess vo däne guete Sache und erscht no soviil me mege het. Es isch sogar no nochserviert worde. Mhh isch das fein gsi. Nonere kurze Pause isch no e feins Dessert ko, nämlig e Caramelkepfli. Ooni Espresso wär jo das Aesse garn nit abgschlosse gsi. Etligi Aawäsendi hän none Schnäpsli zer Verdauig gno. S isch wieder e scheene, gmietlige Aaloss gsi wie allewyl in dr Alte Garde. Mir hetts gfalle.

Heidi