Dr Bummel vom 19. Meerze 2023

Nonere wunderschene Fasnacht mit prächtigem Wätter isch halt scho wider dr Bummel aagseit gsi. Mir hän natirlig dänggt dass mer au wider e droggene Bummel hätte, obwool d Wätterprognose eher schlächt gsi isch aber mir hän halt ghofft dass si wider emool nit stimmt. Am Morge isch es jo no drogge gsi wo mir uns am elfi im Glunggi-Käller zem Apero troffe hän. Dert hets z dringge gä und feini Sunnereedli. Dä Apero isch gstiftet worde vo unserem Dammburmajor dä het nämlig si achzigschte Geburtstag gha. Ganz härzlige Dangg und alles Gueti zem Geburtstag, liebe Joggi. Unsere Obma dr Peter Spieler het no e schöni Aasproch gha, het alle danggt wo fir die glungeni Fasnacht gschafft hän. Em Joggi het är natirlig au zem 8o. gratuliert und em alles gueti gwinscht. Mir alli hän klatscht fir das Geburtstagskind.

No ebbenere guete Stund sin mer iber d Stroos gwanderet ins Reschtorant Rubino. Dert hämmer e zweite Apero serviert biko; mit zwei verschidene Flammkueche denn sin no Platte ko mit Rohschunke, Bindnerfleisch, Salami und Käs. Derzue het me kenne Wy, Bier, Mineral oder Coca bstelle. So um die halbi eins isch me denn ins Reschtorant zem Aesse gange. Mer sin froo gsi dass mer scho dinne gsi sin. Es hett afo schütte was abe mege hett und mir sin am Schärme bineme herrlige Aesse ghögglet. Zer Vorspys hets Forällefilet mit Barbe di Frate, Dörrtomate und Meerrettich gää. Zem Hauptgang isch Kalbsbroote mit Härdöpfel-Gratin und Gmies serviert worde. Derzue het me natirlig eppis zem dringge kenne bstelle. Speter hämmer no e Dessert biko, nämlig Zwätschgeweie mit Schlagrahm und Vanilleglace.Drno het dr Obmaa verzellt dass jetz e Band kunnt. Die hän uns rassigi Tafelmuusig bote. Die Improvisannte sin 7 Musiker gsi wo e bsunderi Art vo Jazz zelebriert hän, rassig und müpfig. Mir hetts seer guet gfalle.

Am finfi zobe isch es denn wider drogge gsi und denn simmer use go pfyffe und drummle. Mer sin d Baimligass abe in dien freii Stroos marschiert aber denn gly links wäg in d Falknerstross. Dert hämmer dr erschti Halt gmacht. I bi mit etlige Gspänli dusse bliibe will d Fasnachtsmuusig jo s ganzi Joor eso nimm erläbe kasch. Es isch immer no drogge gsi bis zem nägschte Halt. Am 7ni hätte mir wider sotte ystoo aber es het halt wider gschifft, und wie, und so isch dä Halt verlängeret worde bis am nini. E paar Passivi und halb granki und au d Dora eini vo unsere Pfyffere sin heimgange. D Dora het ebe erscht ir neis Gneu misse richte lo, au d Aerzt mache Fääler, aber es gootere entsprächend guet. Am 9i hetts gheisse yystoo und mer göön dirägt in Stadthof. Die meischte hän gfunde si heige gnueg drungge und so simmer denn zem obligate Wettstai-Marsch und zer verabschiidig vo dr Fsnacht 2023 gschritte. Es hett nimm so guet deent aber es isch e scheene Bummel gsi drotz däm Wätter. Zem Abschluss simmer no in Stadthof go dr Schlummerdrungg und e paar Bretli nää. Und das isch es scho wider gsi fir das Joor, ich has gnosse. I freu mi scho uff d Summerstämm.

Heidi